Урадзіла на славу!

ААТ «Новая Прыпяць» – адна з чатырох гаспадарак раёна, якая займаецца вырошчваннем бульбы. Сёлета яе ўбралі з 14 гектараў. Ураджайнасць парадавала: амаль 300 цэнтнераў з гектара. Сховішча з другім хлебам, як у народзе называюць бульбу,  знаходзіцца ў вёсцы Туры.

Туды мы і накіраваліся, каб пабачыць, як адбываецца сартаванне. 
Кіруе працэсам Таццяна Брышчук, якая расказала, што для пасадкі аддаюць перавагу гатунку «Першацвет», паколькі ён выдатна захоўваецца і заўжды паказвае вялікую ўраджайнасць. У гэтым годзе, нягледзячы на даволі спякотнае лета, бульба таксама не падвяла і ўрадзіла на славу. Частку яе павязуць на кірмашы, якія традыцыйна ладзяцца восенню. 
–  Нашу бульбу выдатна купляюць, бо ведаюць яе смакавыя якасці, –  кажа Таццяна Уладзіміраўна. – Мяркую, у гэтым годзе на яе таксама будзе вялікі попыт.

А на полі бліз вёскі Хорск на бульбаўборачным камбайне працавалі Анатолій Патрубейка і Юрый Каляда. У час нашага візіту за бульбай прыехаў Фёдар Стаднік, які сёмы год працуе на яе адвозцы. 
– Самі бачыце, якая ладная наша бульбачка. Будзе, што есці, –  з радасцю адзначыў ён. 
Так што, паважаныя чытачы, хто хоча набыць бульбу ААТ «Новая Прыпяць», прыходзьце на кірмашы. 
Ганна МЕЛЬНІК
Фота аўтара