Песня на збожжатакі завітала

IMG_6267

Нягледзячы на карэктывы, якія ўнесла ў ход уборачнай кампаніі дажджлівае надвор’е, работа ў гаспадарках не спыняецца ні на хвіліну. Працаўнікі сельскай гаспадаркі нястомна працуюць, каб  зберагчы кожнае зярнятка. Якраз у гэты час набіраюць абароты летнія маршруты аўтаклуба раённай клубнай сістэмы (загадчык Таццяна Цупа), каб даць магчымаць працаўнікам сяла крышачку адпачыць ад нялёгкай работы і  падарыць добры настрой мілагучнай звонкай песняй ды  жартам.

18 ЛІПЕНЯ работнікі культуры разам з галоўным спецыялістам па ідэалагічнай рабоце і справах моладзі Столінскага райвыканкама Таццянай Васільеўнай Дабрынец наведалі аграгарадок Глінка і вёску Асаўцы. 

На збожжатоку КСУП “АграГлінка”   кіпела работа, але, заўважыўшы гасцей, людзі зацікаўлена падыходзілі да артыстаў.  Праз лічаныя хвіліны была падрыхтавана імправізаваная сцэна, а гледачы занялі свае пачэсныя месцы, каб атрымаць асалоду ад канцэртнай праграмы. Толькі загучала музыка, як на яе гукі пачалі сыходзіцца мясцовыя жыхары, пад’язджалі  на машынах і на вазах.

IMG_6324 IMG_6266 IMG_6359 IMG_6338 IMG_6332 IMG_6331Удзельнікі народнага творчага клуба “Альтанка” прывіталі гледачоў вясёлымі жартамі, а народны клуб аматараў песні “Ярок”  (кіраўнік Валерый Шуркала) распачалі сваё выступленне мілагучнымі песнямі на беларускай мове пра родную зямлю, радзіму, родны край і крыніцу. Праграму прымеркавалі да Году малой радзімы.

Кожны музычны нумар прысутныя сустракалі гучнымі апладысментамі, прыйшоўся ім даспадобы і гумар артыстаў.

Напрыканцы сустрэчы Таццяна Дабрынец пажадала работнікам гаспадаркі моцнага здароўя, дабрабыту, жыццёвых сіл і плёну ў іх нялёгкай працы. Старшыня прафкама і спецыяліст па ідэалагічнай рабоце гаспадаркі Любоў Пятроўна Бут-Гусаім падзякавала гасцям за цудоўнае выступленне і выказала ад імя работнікаў пажаданне, каб “клуб на колах” завітваў у КСУП “АграГлінка”  і далей радаваў яго работнікаў новымі цікавымі выступленнямі.

У АБЕДЗЕННЫ ЧАС аўтаклуб завітаў на збожжаток КСУП “Відзіборскі” ў вёску Асаўцы. Работнікі гаспадаркі з радасцю сустрэлі  ўдзельнікаў аматарскай творчасці.  Пакуль тыя рыхтаваліся да выступлення, людзі ўсё  падыходзілі, каб крышачку адпачыць і паслухаць цудоўныя спевы артыстаў.  У час выступлення не сціхалі апладысменты. Усе смяяліся ад душы. А мужчыны так гучна пляскалі ў далоні, што нават не змаглі  ўседзець на месцы і разам з  артыстамі пусціліся ў скокі.

Песні, жарты, танцы захапілі гледачоў і час праляцеў як адно імгненне. На развітанне працаўнікі гаспадаркі ад шчырага сэрца дзякавалі за такі цудоўны канцэрт і падарылі артыстам кветкі. Яны жадалі адзін аднаму моцнага здароўя, плёну  ў працы, шчасця і дабрабыту. На развітанне на памяць  зрабілі агульны здымак.

Работнікі культуры не збіраюцца, як гавораць, сядзець на месцы. Іх канцэртныя праграмы пройдуць і ў іншых гаспадарках раёна, каб падтрымаць хлебаробаў і задаць бадзёры рытм працы.

Людміла КАСПЯРОВІЧ

Фота аўтара

Добавить комментарий

Ваш e-mail не будет опубликован. Обязательные поля помечены *