Прэзідэнт вызначыў меры павышэння эфектыўнасці эканомікі Беларусі

Фото с сайта http://www.belarus.by

Кіраўнік дзяржавы Аляксандр Лукашэнка 23 лютага падпісаў Указ № 78 «Аб мерах па павышэнні эфектыўнасці сацыяльна-эканамічнага комплексу Рэспублікі Беларусь».

У дакуменце выкладзены сістэмныя меры, накіраваныя на павышэнне эфектыўнасці функцыянавання эканомікі за кошт забеспячэння належнай якасці кіравання дзяржаўнымі прадпрыемствамі і зніжэння сабекошту прадукцыі, развіцця добрасумленнай канкурэнцыі на ўнутраным рынку, росту і дыверсіфікацыі экспарту, рацыянальнага імпартазамяшчэння.

Прадугледжваецца паскоранае развіццё малога і сярэдняга бізнесу, прыцягненне замежнага капіталу ў развіццё і стварэнне вытворчасцяў, паступальнае зніжэнне ставак па крэдытах у эканоміцы.

У дакуменце закладзены выразныя падыходы па мабілізацыі кадраў на аператыўнае і эфектыўнае вырашэнне праблем сацыяльна-эканамічнага развіцця на аснове рэльефнага раздзялення адказнасці.

Лукашэнка ўстанавіў персанальную адказнасць за своечасовае пагашэнне валютных абавязацельстваў

Прэзідэнт Беларусі Аляксандр Лукашэнка ўстанавіў персанальную адказнасць кіраўнікоў розных узроўняў за своечасовае пагашэнне валютных абавязацельстваў. Такая норма змешчана ва ўказе № 78.

У прыватнасці, Прэзідэнт даручыў ураду і Нацыянальнаму банку праводзіць збалансаваную макраэканамічную палітыку, накіраваную на нарошчванне дзяржаўных золатавалютных рэзерваў да эканамічна бяспечнага ўзроўню, які пакрывае трохмесячны імпарт тавараў (работ, паслуг), а таксама кароткатэрміновыя даўгавыя абавязацельствы Беларусі ў замежнай валюце.

Кіраўнік дзяржавы паставіў задачу забяспечваць своечасовае і поўнае выкананне абавязацельстваў, у тым ліку праз рэфінансаванне, пад персанальную адказнасць прэм’ер-міністра — па пагашэнні валютнага доўгу ўрадам і рэспубліканскімі органамі дзяржаўнага кіравання, пад персанальную адказнасць старшыні праўлення Нацбанка — па пагашэнні валютных абавязацельстваў Нацыянальнага банка. Устанаўліваецца персанальная адказнасць старшынь аблвыканкамаў і Мінскага гарвыканкама за пагашэнне валютнага доўгу мясцовых органаў кіравання і самакіравання і персанальная адказнасць кіраўнікоў арганізацый і камерцыйных банкаў — за пагашэнне валютнага доўгу гэтых і падпарадкаваных ім арганізацый.

Пры гэтым Савет Міністраў упаўнаважаны на падпісанне міжурадавых і міжнародных дагавораў, накіраваных на прыцягненне інвестыцыйных рэсурсаў ад міжнародных фінансавых арганізацый, у якіх змешчаны палажэнні, адрозныя ад норм заканадаўчых актаў Беларусі, з далейшай ратыфікацыяй такіх дагавораў ва ўстаноўленым парадку.

Лукашэнка вызначыў крытэрыі эфектыўнасці работы ўрада і кіраўнікоў

У прыватнасці, эфектыўнасць работы прэм’ер-міністра і яго першага намесніка будзе ацэньвацца па выніках забеспячэння макраэканамічнай стабільнасці і эфектыўнага кіравання валютным доўгам урада, намеснікаў прэм’ер-міністра і міністра замежных спраў — па росце і дыверсіфікацыі экспарту.

Ацэнка эфектыўнасці работы старшыні праўлення Нацыянальнага банка будзе давацца па выніках забеспячэння фінансавай стабільнасці ў краіне, скарачэння валютных абавязацельстваў Нацбанка, нарошчвання міжнародных рэзервовых актываў Беларусі.

Крытэрыямі, па якіх будзе ацэньвацца эфектыўнасць работы кіраўнікоў рэспубліканскіх органаў дзяржаўнага кіравання, з’яўляюцца аб’ём прыцягнутых прамых замежных інвестыцый у галіну і рацыянальнае імпартазамяшчэнне.

Эфектыўнасць работы старшынь абласных, Мінскага гарадскога выканкамаў будзе ацэньвацца па аб’ёме прыцягнутых прамых замежных інвестыцый у рэгіён, рацыянальным імпартазамяшчэнні, росце і дыверсіфікацыі экспарту, стварэнні новых рабочых месцаў, работа старшынь раённых (гарадскіх) выканкамаў – па колькасці створаных новых рабочых месцаў, а работа кіраўнікоў дзяржаўных прадпрыемстваў – па паказчыку чыстага прыбытку і скарачэнні сабекошту вырабляемых тавараў (работ, паслуг).

Для павышэння аператыўнасці прымаемых рашэнняў, скарачэння тэрмінаў адміністрацыйных працэдур Савет Міністраў надзелены паўнамоцтвамі ўстанаўліваць тэрміны ўзгаднення дзяржаўнымі органамі, у тым ліку падпарадкаванымі Прэзідэнту, праектаў заканадаўчых актаў па важнейшых пытаннях дзяржаўнага рэгулявання ў эканамічнай сферы.

Лукашэнка даручыў да 1 чэрвеня ўнесці прапановы па скарачэнні функцый дзяржорганаў і падстаў для праверак

Кіраўнік дзяржавы Аляксандр Лукашэнка даручыў Савету Міністраў сумесна з Адміністрацыяй Прэзідэнта Беларусі і Дзяржаўным сакратарыятам Савета бяспекі да 1 чэрвеня 2016 года ўнесці прапановы па скарачэнні функцый дзяржорганаў.

Так, Прэзідэнт чакае прапаноў па скарачэнні залішніх і дубліруючых функцый органаў дзяржаўнага кіравання, кантралюючых (наглядных) і праваахоўных органаў, а таксама па мінімізацыі наглядных праверак, скарачэнні наглядных органаў, падстаў для правядзення такіх праверак і павышэнні ролі пракуратуры ў забеспячэнні законнасці.

Акрамя таго, да 1 чэрвеня павінны быць прадстаўлены прапановы па ўдасканаленні сістэмы падбору і расстаноўкі кадраў, іх навучання і перападрыхтоўкі (у тым ліку за мяжой), павышэння матывацыі на дасягненне вынікаў сацыяльна-эканамічнага развіцця.

Павінны быць таксама ўнесены прапановы па ўдасканаленні парадку і ўмоў назначэння (вызвалення ад займаемай пасады) кіраўнікоў дзяржаўных арганізацый, а таксама арганізацый, у статутных фондах якіх 50 і больш працэнтаў акцый (долей у статутных фондах) належыць дзяржаве.

Ад прадпрыемстваў у Беларусі будуць патрабаваць не напаўнення бюджэту, а стабільнай і бясстратнай работы

У прыватнасці, ураду Беларусі даручана на працягу 2016 года забяспечыць перагляд паказчыкаў эфектыўнасці работы фіскальных органаў у частцы зрушэння акцэнтаў з бягучага напаўнення бюджэту суб’ектамі гаспадарання на стратэгічнае забеспячэнне іх стабільнай і бясстратнай работы.

Урад таксама павінен правесці на працягу гэтага года карэкціроўку абавязковых да прымянення тэхнічных нарматыўных прававых актаў, прадугледзеўшы выключэнне з іх патрабаванняў і абавязкаў, непасрэдна не звязаных з бяспекай прадукцыі (работ, паслуг).

Вызначаны напрамкі для аптымізацыі і скарачэння расходаў кансалідаванага бюджэту Беларусі ў 2016 годзе

Савету Міністраў, аблвыканкамам і Мінскаму гарвыканкаму даручана прыняць вычарпальныя меры па аптымізацыі і скарачэнні расходаў кансалідаванага бюджэту Беларусі на 2016 год. У дакуменце пералічаны першачарговыя напрамкі для змяншэння расходаў.

У іх ліку расходы на няпершачарговыя капітальныя ўкладанні (набыццё абсталявання і іншых асноўных сродкаў, капітальнае будаўніцтва, рэканструкцыя і капітальны рамонт).

Плануецца скараціць расходы на ўтрыманне органаў дзяржаўнага кіравання, мясцовага кіравання і самакіравання за кошт аптымізацыі функцый і колькасці дзяржаўных органаў усіх узроўняў. Прадугледжана, што сродкі ад гэтай аптымізацыі накіроўваюцца на павышэнне заработнай платы дзяржаўных служачых.

Будуць таксама зменшаны расходы на пакрыццё (кампенсацыю) працэнтаў па крэдытах у беларускіх рублях, выдадзеных або выдаваемых па дзяржаўных праграмах і мерапрыемствах (за выключэннем крэдытаў на жыллёвае будаўніцтва). У гэтых мэтах прадугледжана павялічыць стаўкі па крэдытных дагаворах на 2 працэнтныя пункты з адначасовым змяншэннем у аналагічным памеры стаўкі пакрыцця (кампенсацыі) за кошт сродкаў рэспубліканскага і мясцовых бюджэтаў працэнтаў па гэтых крэдытах.

Пад скарачэнне таксама падпадуць расходы на датацыі, перадаваемыя з рэспубліканскага бюджэту ў кансалідаваныя бюджэты абласцей і ў бюджэт г. Мінска.

Ураду, аблвыканкамам і Мінскаму гарвыканкаму таксама даручана прыняць вычарпальныя меры па мінімізацыі негатыўных наступстваў, абумоўленых ростам цэн на спажывецкія тавары ў выніку прымянення мер бюджэтнай кансалідацыі. Пры гэтым прырост індэкса спажывецкіх цэн ад названых мер не павінен перасягаць 3,7 працэнта.

Неабходна таксама рэалізаваць кампенсуючыя меры падатковай палітыкі, накіраваныя на аднаўленне даходаў бюджэту і зніжэнне іх залежнасці ад кан’юнктуры знешняга попыту на сыравінныя тавары.

Кіраўнікам рэспубліканскіх органаў дзяржаўнага кіравання і іншых арганізацый, падпарадкаваных ураду, старшыням аблвыканкамаў і Мінскага гарвыканкама даручана забяспечыць першачарговае зніжэнне затрат на закупку імпартнай сыравіны (матэрыялаў, камплектуючых), скарачэнне расходаў на ўтрыманне адміністрацыйна-кіраўніцкага апарату, адмова ад доўгатэрміновых капітальных укладанняў у невытворчую сферу (у тым ліку за кошт валютных крыніц).

Узмацненне адраснай сацпадтрымкі і ўвядзенне безнаяўных субсідый на аплату ЖКП плануецца ў Беларусі

Адпаведныя рашэнні змешчаны ва Указе кіраўніка дзяржавы ад 23 лютага 2016 года № 78 «Аб мерах па павышэнні эфектыўнасці сацыяльна-эканамічнага комплексу Рэспублікі Беларусь».

Савету Міністраў Беларусі для забеспячэння сацыяльнай абароны насельніцтва, дадатковай падтрымкі малазабяспечаных, уключаючы асоб пенсійнага ўзросту і іншых сацыяльна слабаабароненых катэгорый грамадзян, даручана ўнесці шэраг прапаноў.

Гэта, у прыватнасці, датычыцца павелічэння з 1 сакавіка 2016 года бюджэту пражытачнага мінімуму ў сярэднім на душу насельніцтва; узмацнення з той жа даты механізмаў дзяржаўнай адраснай сацыяльнай падтрымкі грамадзян, у тым ліку шляхам перагляду памераў выплат сацыяльнага характару.

Плануецца таксама ўкараніць з 1 кастрычніка 2016 года безнаяўныя жыллёвыя субсідыі для частковай аплаты асноўных жыллёва-камунальных паслуг.

Ураду, аблвыканкамам і Мінскаму гарвыканкаму даручана сфарміраваць у 2016 годзе рэзервы ў рэспубліканскім бюджэце ў памеры да Br8 трлн для аказання мераў сацыяльнай падтрымкі асобным катэгорыям насельніцтва, у мясцовых бюджэтах — да Br2,8 трлн для фінансавання расходаў на прадастаўленне безнаяўных жыллёвых субсідый за кошт эканоміі ў выніку зніжэння бюджэтнага субсідзіравання жыллёва-камунальных паслуг.

Саветам дэпутатаў абласнога і базавага тэрытарыяльных узроўняў прапанавана разгледзець магчымасць аказання за кошт адпаведных мясцовых бюджэтаў дадатковай сацыяльнай падтрымкі дзецям, моладзі, ветэранам, інвалідам, пажылым людзям, а таксама іншым катэгорыям грамадзян, якія маюць патрэбу ў дапамозе.

Лукашэнка патрабуе ўзмацніць гарантыі абароны ўласнасці ў Беларусі

Такая норма змешчана ва Указе  кіраўніка    дзяржавы  ад  23  лютага  2016 года  №  78 «Аб мерах па павышэнні эфектыўнасці сацыяльна-эканамічнага комплексу Рэспублікі Беларусь».

У дакуменце вызначана, што Генеральная пракуратура і суды павінны забяспечваць безумоўнае і няўхільнае выкананне прадугледжанай Канстытуцыяй Рэспублікі Беларусь гарантыі абароны ўласнасці.

Указ уступае ў сілу пасля яго афіцыйнага апублікавання.

БелТА

Добавить комментарий

Ваш e-mail не будет опубликован. Обязательные поля помечены *