Брэстчыну на рэспублiцы прадставiць «Уладар сяла» са Столiншчыны

У рамках абласнога фестывалю-кірмашу працаўнікоў вёскі  “Дажынкі-2015” у г. Іванаве адбыўся абласны этап рэспубліканскага праекта “Уладар сяла”. На абласным этапе Століншчыну прадстаўляла  пераможца раённага этапу — сям’я Кажаноўскіх: Іван, Вольга і іх трое дзетак з аграгарадка Велямічы і сярод 12 сем’яў  з 12 раёнаў Брэстчыны  заняла першае месца (на здымку).

Як паведаміў першы сакратар РК ГА «БРСМ» Вадзім Заруба, удзельнікам спаборніцтваў належала прайсці тры выпрабаванні. Калі ў першым конкурсе “Вітаем па-беларуску” нашы  прадстаўнікі былі ў залатой сярэдзіне,  дык у наступных ім не было роўных.  Распілаваць бервяно, пакалоць на паленні  і выкласці імі слова “сям’я” патрабавалася ў конкурсе “Па дровы”. “Святочны воз” – гэта ўменне абыходзіцца з канём і возам. Жонка павінна была распрэгчы каня, а муж – запрэгчы. І апошняе спаборніцтва  – дамашняе заданне “Сялянскія прысмакі”. Сем’і  падрыхтавалі выстаўку-дэгустацыю  любімых сямейных страў.

Па выніках конкурсу трэцяе месца прысуджана сям’і з Івацэвічаў, другое – сям’і з Іванава, а першае заслужана атрымала сям’я Кажаноўскіх,   на тры балы апярэдзіўшы гаспадароў фестывалю.

Цяпер сям’я са Століншчыны будзе адстойваць гонар Брэстчыны на заключным этапе рэспубліканскага праекта “Уладар сяла”.  Пажадаем ёй удачы і дастойна прадставіць вобласць і раён!

Галіна ГАШЧУК